Menneskerettar og openheitslova

Avinor har i fleire år arbeidd med ansvarleg forretningsførsel, og har sidan 2022 systematisk arbeidd for betre å møte krava i lov om verksemder si openheit og arbeid med grunnleggjande menneskerettar og anstendige arbeidsforhold (openheitslova), samt OECD-rammeverket. Avinor har eit omfattande styringssystem med prosedyrebeskrivingar for alle funksjonar i konsernet. Arbeidet med aktsemdsvurderingar er innarbeidd i selskapet sitt interne styringssystem for å sikre implementering av aktsemdsvurderingar i alle relevante funksjonar i konsernet.

Aktsemdsvurderingar

Avinor gjennomfører aktsemdsvurderingar i tråd med OECDs retningsliner for ansvarleg næringsliv for å identifisere, redusere og førebyggje brot på menneskerettar og arbeidsvilkår. Metodikken i aktsemdshjulet er implementert i Avinors styringssystem gjennom policyar, retningsliner og prosedyrebeskrivingar. Aktsemdshjulet er integrert i gjennomføringa av risikovurderingar. Avinor har ei risikobasert tilnærming til aktsemdsvurderingar og prioriterer dei områda vi finn den mest alvorlege risikoen kombinert med vår påverknadsmoglegheit. For eiga verksemd betyr det at vi prioriterer dei forholda som i størst grad potensielt kan påverke eigne tilsette negativt, eller påverknad gjennom Avinors verksemd som skadar samfunn, menneske, klima og miljø negativt.

Kartlegginga vert oppdatert årleg med utgangspunkt i planlagde innkjøp og større prosjekt som inkluderer innkjøp av varer eller tenester som vert rekna å innehalde ein potensiell risiko for negativ påverknad. Gjennom offentlege innkjøp og i stor grad langsiktige rammeavtalar med leverandørar vil vi i mange tilfelle vere i ein god posisjon til å kunne utbetre forhold i leverandørkjeda i samarbeid med våre partnarar og leverandørar. I tilfelle der Avinor åleine ikkje har moglegheit til å påverke risikoen i særleg grad, er hovudregelen at vi forsøker å samarbeide med andre selskap og interesseorganisasjonar om påverknad.

Medlemskap og samarbeid

Gjennom medlemskap i Etisk handel Norge og Transparency International Norge forpliktar vi oss til å arbeide for berekraftig forretningspraksis som respekterer menneske, samfunn og miljø. Vi deltek i relevante bransjenettverk for vår verksemd og samarbeider med andre verksemder om utfordringar i sektorar, eller knytt til spesifikke produkt.

Klagemekanismar, avbøtande tiltak og varsling

Innrapportering av klager er viktige verkty for å få informasjon om forhold der Avinor har påverknad på omgivnader, enkeltpersonar eller grupper. Klagene kan gjelde tilfelle som enkeltpersonar har vore utsette for på Avinors lufthamner, eller samfunns- og miljøspørsmål. Avinor har fleire klagemekanismar, avhengig av interessegruppe og om forholda er kjende eller ukjende. Skjema for generelle klager er offentleg tilgjengeleg på Avinor.no: https://tilbakemelding.avinor.no/

Gjennom Avinors varslingskanal kan både tilsette og eksterne varsle om kritikkverdige forhold, også anonymt og til ekstern mottakar av varsel. Varslingskanalen er tilgjengeleg på Avinor.no: https://avinor.no/konsern/pa-flyplassen/varsling/

I situasjonar der det vert avdekt negativ påverknad på menneskerettar som Avinor har forårsaka eller bidrege til, vil selskapet samarbeide om og gje tilgang til og/eller sørgje for gjenoppretting og/eller erstatning. Alle klager og varslingssaker vert behandla via Avinors varslingsinstitutt i tråd med norsk regelverk og god praksis.