Naturmangfald
Naturmangfald rundt Avinors lufthamner
Mange av Avinors lufthamner ligg i område med høgt biologisk mangfald. Desse inkluderer verneområde, lakseelver, artsrike enger, våtmarker, gyteområde og leveområde for fleire truga artar.
Avinor har gjennomført kartlegging av biologisk mangfald ved samtlige lufthamner, inkludert influensområda. Kartleggingane blei hovudsakleg utførte i perioden 2009–2014, med enkelte oppdateringar og spesialiserte undersøkingar av utvalde artsgrupper – som humler – i etterkant. Resultata er offentleg tilgjengelege i Naturbase og Artskart, og rapportane finst her. Kartleggingane gir ei oversikt over naturverdiane på og rundt Avinors eigedommar, og kunnskapen blir aktivt brukt i drift, planlegging og prosjekt. Forvaltningsråda frå kartleggingane blir følgde opp innanfor rammene for trygg og effektiv lufthamndrift.
Lufthamndrift påverkar naturen på fleire måtar, blant anna gjennom arealbeslag, støy, lysforureining, bruk av kjemikaliar, utslepp av mikroplast, vilt- og fuglekontroll samt spreiing av framande artar. Avinor arbeider kontinuerleg for å redusere desse påverknadene, og set òg i verk positive tiltak der det er mogleg. Døme på dette er etablering og forbetring av habitat for ville pollinerande insekt, som blomsterrike enger, samt fjerning av framande og skadelege artar.
I 2025 ferdigstilte Avinor ein naturrisikorapport utarbeidd i samsvar med metodikken frå Task Force On Nature-Related Financial Disclosure (TNFD).
Rapporten er tilgjengeleg her:
Naturmangfald i nye prosjekt
Utbygginga av nye lufthamner i Bodø og Mo i Rana er to store prosjekt med betydeleg påverknad på natur og omfattande arealbeslag.
I samband med utbygginga av ny lufthamn i Bodø (NLBO) har Avinor etablert ei tilskotsordning for naturtiltak – les meir her. Som ein del av byggeprosjektet for ny lufthamn i Mo i Rana har Avinor sett i gang eit pilotprosjekt der eit mindre myrområde er flytta til eit kunstig basseng sprengt ut i fjell innanfor inngrepsområdet. Målet er å etablere eit nytt myrområde og samstundes skaffe meir kunnskap om metodar for flytting av myr. Les meir om prosjektet hos Nordlandsforskning: Myr i Rana | Nordlandsforsking