Handterer flytrafikk i arktiske forhold

I det vi møter Jeroshan i tårnet ved Tromsø lufthamn, Langnes tar eit ambulansefly av i sørgåande retning. Trafikken inn og ut av lufthamna er variert, og operasjonane som flygeleiarane har ansvaret for, kan til tider vere hektiske.

- Tromsø er ein av flyplassane med mest kompliserte vinteroperasjonar, og er sånn sett ein flott stad å ha opplæringsperioden, eller «on the job training», som vi kallar det, seier Ståle Johnsen, sjefsflygeleiar ved Tromsø Tårn.

Når ein har gjennomført den teoretiske delen av utdanninga, skal ein gjennomføre ein praksisperiode ved ei operativ eining i Noreg. Denne tar som regel om lag eitt år, før ein blir sertifisert som flygeleiar.

- I løpet av «on the job training»-perioden, skal alle elevar gjennom fire fasar, som alle må beståast før ein kan kome vidare og bli sertifisert flygeleiar. Denne perioden byggjer på den teoretiske grunnutdanninga frå første året i studieløpet. Forskjellen frå første året er at ein i praksisperioden får oppleve flygeleiaryrket anten i eit tårn eller ved ein kontrollsentral. Det er også ein del særeigne norske reglar ein må lese seg opp på i praksisperioden, i tillegg til det ein lærte på grunnutdanninga, fortel Jeroshan.

God balanse mellom jobb og fritid

Jeroshan er opphavleg frå Bergen, og som bergensarar flest, er han veldig glad i heimbyen sin. Tromsø er derimot ein svært bra stad å bu og jobbe.

- Eg trivst veldig godt her i Tromsø. Byen har eit pulserande liv, mange fritidstilbod og flott natur. Tromsø er ein storby, med alle dei tilboda det medfører, samstundes som det er kort veg til naturen. På fritida driv eg mykje med musikk, og den hobbyen får eg absolutt høve til å dyrke ved sida av jobben ved kontrolltårnet ved Tromsø lufthamn.

Når ein skal velje karriereveg, opplever mange dilemmaet mellom å måtte følgje draumane sine og å prioritere vener og kjærast. Jeroshan har sjølv kjærast i Oslo, og har eit reflektert perspektiv på det å ha eit langdistanseforhold.

- Dette er sjølvsagt eit vanskeleg val ein tek når ein skal velje utdanning og karriere, men eit langdistanseforhold fungerer fint så lenge båe partar er innstilte på at det skal nettopp fungere. Samstundes er det ikkje noko problem å kunne reise til Oslo på fridagane mine. Det at ein jobbar turnus, gjer at ein òg kan ha fleire dagar fri i strekk. Dette er ein klar fordel med flygeleiaryrket, slik eg ser det.

Les meir om Flygeleiar jobben, utdanninga og opptaksprøva her!