Om Avinor

Velg hvilke informasjonskapsler Avinor kan bruke.

Avinor behandler data på denne nettsiden for å gi deg en bedre opplevelse. Vi samler anonym statistikk og bruker informasjonskapsler for å tilpasse innhold og annonser.

Les mer om personvern i Avinor

Bli flygeleiar

    Drøymer du om ein jobb der du kan kombinere raske avgjersler med komplekse utfordringar? Då kan flygeleiar vere den perfekte karrieren for deg! Her får du eit innblikk i yrket, anten du berre er nysgjerrig eller ønskjer å søkje utdanning.

    Flygeleiarar i eit flykontrolltårn overvakar flytrafikken ved hjelp av kikkert og dataskjermar.

    Om jobben som Flygeleiar

    1. Kva gjer ein Flygeleiar?

      Ein flygeleiar sørgjer for trygg og effektiv trafikkavvikling ved å instruere pilotar om spesifikke høgder, retningar, fart, og andre prosedyrar. Dei har eit ansvar for fly i ulike fasar av flyginga, som avgang, innflyging og passering av luftrommet, og må ha god simultankapasitet, vere fokuserte og nøyaktige.

    2. Kvar jobbar ein flygeleiar

      Flygeleiarar kan jobbe i kontrolltårn, ved innflygingskontroll, eller på ein eining for områdekontroll. Dei fleste er tilsette i Avinor, og arbeidsstaden avheng av kva type kontroll dei utfører, anten det er i kontrolltårnet, innanfor innflygingskontroll, eller i områdekontrollen som dekkjer større luftrom mellom flyplassar.

    Ein mann i ein kontrollromsmiljø jobbar med fleire dataskjermar framfor seg. Han har på seg ein grå hettegenser og ser konsentrert ut. Skjermar viser informasjon som kan vere relatert til overvaking eller kontrollfunksjonar.

    Utdanninga

    For å bli flygeleiar må du gjennomgå ei kombinert teoretisk og praktisk utdanning som varer i omtrent 2 år. Den grunnleggande delen av utdanninga skjer ved Czech Air Navigation Institute (CANI) i Praha, Tsjekkia, og den praktiske delen føregår i eit kontrolltårn eller ei kontrollsentral i Noreg. Kostnadene for den teoretiske delen dekkjast av Avinor, og utdanninga er godkjend av Lånekassen som eit ni månaders studium. Under den praktiske delen er elevane mellombels tilsett hos Avinor og mottar løn.

    Opplæringa inkluderer:

    Forkurs i Noreg (ca. 1 veke):
    Innleiande opplæring for å førebu elevane på vidare utdanning og praktiske studiar.

    Initial Training ved CANI i Praha, Tsjekkia (ca. 9 månader):
    Gjennom to semester får elevane grunnleggande utdanning om flygeleiar-yrket, samt simulatortrening saman med instruktørar. Dette gjer dei klare for neste steg i praksis.

    Transisjonskurs (ca. 2–3 veker):
    Kurs i norske reglar og forskrifter, systemopplæring og meteorologi for å tilpasse utdanninga til norske luftfartsforskrifter.

    Praktisk opplæring (cirka 1 til 1,5 år):
    Trening ved eit kontrolltårn eller ei kontrollsentral i Noreg.

    Opptakskrav

    For å bli vurdert til opptaksprøvane, må alle følgjande krav vere oppfylte:

    Alderskrav: 

    • Du må ha fylt 19 år pr.1.januar i opptaksåret.

    Karakterkrav:

    • Generell studiekompetanse med gjennomsnittskarakter frå vidaregåande skule på 4,0 eller betre.Ingen tilleggspoeng, alderspoeng eller liknande skal reknast med.Det er kun karakterane på vitnemålet eller kompetansebeviset som tel.Vitnemålet må vere klart ved søknadstidspunktet.Viss du først får vitnemål til sommaren, må du dessverre vente til neste år med å søke.

    Språkkrav: 

    • Flytande munnleg og skriftleg norsk.Søkjarar som ikkje har norsk som morsmål må ha bestått Norskprøve B2.Søkjarar som ikkje har norsk som morsmål, men som har fullført norsk vidaregåande skule med karakteren 3 eller betre i både skriftleg og munnleg norsk, treng ikkje Norskprøve B2.

    Engelskkunnskapar: 

    • Du må ha gode ferdigheiter i engelsk.

    Sikkerheitsklarering: 

    • Må kunne oppfylle krav til sikkerheitsklarering.

    Helsekrav: 

    • Du må ha normalt fargesyn og synskorreksjon ikkje meir enn +5 eller -6 dioptri, samt god høyrsel og tydeleg tale.Dersom du har gjennomgått synskorrigerande operasjon som laserbehandling, må synet før inngrepet ikkje ha vore dårlegare enn +5 eller -6.

    Opptaksprøvar

    Alle som er kvalifisert, vil få innkalling til opptaksprøvar. Viss du har delteke tidlegare og ikkje bestått, vil du ikkje få moglegheit til å ta testane på nytt.

    Dei to første fasane av opptaksprøva består av databaserte testar. Testane måler om du har dei nødvendige eigenskapane for å kunne gjennomføre utdanninga og jobbe som flygeleiar. Eigenskapar ein er særleg oppteken av er:

    • Tredimensjonal førestillingsevne (romoppfatning)
    • Snar oppfattelsesevne
    • God konsentrasjonsevne
    • Simultankapasitet (evne til å handtere fleire oppgåver/informasjonar samtidig)
    • Beslutningsevne
    • Koordineringsevne
    • Høg stresstoleranse
    • Gode samarbeidseigenskapar

    Slik går opptaksprosessen føre seg

    • Fase 0: Kontroll av søknaden: Det blir sjekka at du oppfyller opptakskrava og har lasta opp vitnemål frå vidaregåande skule i søknaden.
    • Fase 1: Innleiande opptaksprøve: Det er ikkje eit krav at du må ha brei datakompetanse. Testane går føre seg på engelsk. Originalt vitnemål eller duplikat må skaffast og takast med til opptaksprøvane for kontroll.
    • Fase 2: Består du fase 1, går du vidare til fase 2 som varer i ca. 4 timar. Testane går føre seg på engelsk.
    • Fase 3: Kjem du deg gjennom fase 2, blir du innkalla til fase 3 som er intervju. Intervjuet går føre seg på norsk.
    • Fase 4: Helsesjekk og tryggingsklarering.

    Ofte stilte spørsmål og svar

    Eg har ikkje elektronisk versjon av vitnemålet mitt, kva gjer eg då?​

    Om du ikkje har moglegheit til å ta bilete av eller skanne inn vitnemålet, må du snarast mogleg ettersende ein papirkopi til:

      •  Avinor Flysikring AS, Kompetanse, Postboks 150, 2061 Gardermoen. Ver venleg å merk konvolutten med Flygeleiarutdanning.

    Jo raskare du sender det inn, jo raskare får du svar på søknaden din.

    Eg har deltatt på opptaksprøvene tidlegare og ikkje bestått. Kan eg søkje på nytt og ta opptaksprøvene om igjen?

    Nei, dessverre. Det er ikkje anledning til å ta prøvene om igjen. Dersom du har delteke på opptaksprøvene gjennom Naviair (Danmark) eller LFV (Sverige), kan du heller ikkje delta på opptaksprøvene gjennom Avinor Flysikring då dei skandinaviske landa nyttar dei same testane.

    Det har tidlegare vore krav om avklart verneplikt. Gjeld ikkje dette lenger?

    Kravet om avklart verneplikt har falle bort, dvs. at du kan søkje flygeleiarutdanninga sjølv om du ikkje har vore inne til fyrstegongsteneste. Dei som blir tilbydde studieplass, vil få vilkårsbunde fritak frå fyrstegongsteneste så lenge dei er flygeleiarelevar.

    Eg går siste året på vidaregåande - kan eg søke og ettersende vitnemålet?

    Nei, dessverre. Du må ha fullført vidaregåande skule når du søkjer og kunne leggje ved vitnemålet som stadfestar at du har oppnådd generell studiekompetanse.

    Eg er innkalla til opptaksprøve og har blitt beden om å framvise originalt vitnemål frå vidaregåande skule for kontroll. Eg finn ikkje originalen. Er det ok med kopi av vitnemålet?

    Dessverre. Det er ikkje tilstrekkeleg å framvise kopi av vitnemålet. Kopien eller elektronisk vitnemål har vi allereie motteke som vedlegg i søknaden, så vi har ikkje behov for ein ny kopi. Føremålet er å kontrollere kopien opp mot originalen. Dersom du ikkje finn ditt originale vitnemål, må du ta kontakt med skulen. Dei vil kunne utstede eit duplikat som vi godkjenner som «originalt» dokument.

    Korleis vert gjennomsnittskarakteren rekna ut?

    Vi følgjer same poengberekning som Samordna opptak. Gjennomsnittet blir rekna ut frå alle karakterane på vitnemålet men utan ekstrapoeng av noko slag. Du får altså ingen ekstrapoeng for alder, realfag, språk, kjønn, fordjuping, folkehøgskule, militærteneste etc.

    Eg har 3,9 i snitt frå vidaregåande. Kan eg søkje om opptak?

    Det kjem an på. Vi opererer med éin desimal: 4,0 som absolutt krav. Dersom du har 3,95, blir dette heva til 4,0.

    Eg tilfredsstiller krava til generell studiekompetanse gjennom 23/5-regelen. Gjelder 23/5-regelen også for flygeleiarutdanninga?

    Ja, den gjeld òg for flygeleiarutdanninga. Du må ha 4,0 eller betre i gjennomsnittskarakter i studiekompetansefaga (fagkravet). Hugs å leggje ved dokumentasjon på 5 års utdanning/praksis. Sjå http://www.samordnaopptak.no/info/ for meir informasjon.

    Eg vurderer å ta opp igjen fag for å forbetre karakterane mine - vert sekundærvitnemål godkjent?

    Ja, vi godtar sekundærvitnemål (kompetansebevis) som viser betra karakterar. Du må òg leggje ved fyrstegongsvitnemålet. Du må ha betra karakterane innan søknadsfristen. Ettersending av kompetansebevis/vitnemål etter søknadsfristen blir ikkje godteke.

    Eg er 18 år og blir 19 år i løpet av opptaksåret. Må eg vente til neste opptak før eg kan søkje på flygeleiarutdanninga?

    Ja, du må nok vente med å søkje om opptak.

    Det har tidlegare vore ei øvre aldersgrense på 30 år. Har denne falle bort?

    Ja, den er fallen bort. Det er ingen øvre aldersgrense for å søkje på flygeleiarutdanninga lenger.

    Kan eg oppnå tryggingsklarering sjølv om eg har noko på rullebladet mitt?

    På dette spørsmålet svarar Nasjonal tryggleiksteneste at dei som klareringsstyresmakt vil vurdere din lojalitet, pålitelegheit og sunne dømmekraft etter gitte kriterium i samsvar med tryggingslova § 21 første ledd. Det er ingen automatikk i at du blir nekta klarering dersom du skulle ha ei bakgrunn som er relevant i forhold til nokre av desse kriteriuma. Kvart individ har krav på ei individuell handsaming for å få vurdert si tryggleiksmessige skikkaheit.

    Klikk her for meir informasjon.

    Kva meiner ein med kravet om at synskorreksjonen ikkje kan vere meir enn +5/-6 dioptri?

    Dette tyder at langsyntheit på mindre enn +5 eller nærsyntheit på mindre enn -6 er godteke. Dersom du har gjort synskorrigering, er det verdiane før operasjonen som gjeld.

    Eg vurderer å gjennomføre ein augeoperasjon, vil korrigert syn ved operasjon bli godkjent?

    Vi tilrår deg å undersøkje forhold rundt ein evt. synsoperasjon med ein augelege/optikar. Helsekrav er forskriftsfesta av Luftfartstilsynet. Nærare informasjon om medisinske krav for flygeleiarar (klasse 3) finn du i detalj på nettsidene til Luftfartstilsynet: Medisinske krav klasse 3 flygeleiar.

    Korleis kan eg førebu meg til opptaksprøvane?

    Testane som blir nytta testar eigenskapar som er relativt konstante og som i liten grad kan øvast opp, dvs. eigenskapar som ein anten har eller ikkje har. Nokre av testane kan minne om tradisjonelle IQ-testar, medan andre er spesielt designa for dette testføremålet. Det vi testar for er:

    • Tredimensjonal førestillingsevne (romoppfatting)
    • Rask oppfattingsevne
    • God konsentrasjonsevne
    • Simultankapasitet
    • Avgjerdsevne
    • Koordineringsevne
    • Høg stresstoleranse

    Du kan finne meir informasjon om testane som blir brukte her.

    Når kan eg forvente å begynne utdanninga?

    Dei som består opptaksprøvane i løpet av våren og får tilbod om studieplass, kan i utgangspunktet forvente å starte utdanninga hausten same år.

    Må eg betale skulepengar under flygeleiarutdanninga?

    Utdanninga blir dekt av Avinor Flysikring, dvs. at Avinor Flysikring betaler skulepengar og materiell. Utdanninga er svært kostbar då det bl.a inngår mykje simulatortrening som er særleg ressurskrevjande. Dette blir dekt av Avinor Flysikring medan elevane sjølve må dekkje utgifter til bustad, mat, osv. Utdanninga er godkjend av Lånekassen som eit 9 månaders studium på vanlege vilkår. Flygeleiarelevar får eit lønt engasjement under siste del av utdanninga, praksisperioden i Noreg.

    Er det mogleg å ønskje seg til ei bestemt eining i praksisperioden/plikttenesta?

    Nei, diverre. Det vil ikkje bli teke omsyn til individuelle ønskjer eller spesielle behov ved fordeling av praksisplassar (OJT-eining) eller stad for pliktteneste.

    Når plikttenesta er over, kan ein søkje seg til ei anna eining?

    Når plikttenesta (3 år) er over, kan ein søkje om overføring til anna eining, dersom ein ønskjer det. Når ein får moglegheit til å flytte, avheng av bemanningssituasjonen på den eininga ein er og om det er ledig stilling der ein søkjer.

    Kva lønn og vilkår kan eg forvente under utdanninga og når eg er ferdig AFIS fullmektig?

    Under utdanning

    Flygeleiar-elevar blir tilsette mellombels i Avinor Flysikring AS når dei byrjar på den praktiske delen, og får løn under utdanninga.

    Løna er på 415.100 kr pr. 01.04.2024. Løna er meint å dekkje alle utgifter i samband med utdanninga, som buutgifter og reisutgifter.

    For den grunnleggjande delen er det mogeleg å søkje Lånekassen etter vanlege vilkår for utanlandsstudentar, medan Avinor dekkjer skulepengane.

    Opplæringa føregår hovudsakleg på dagtid, men noko ubekvem arbeidstid må reknast med. Den mellombelse tilsetjinga varer til opplæringa er fullført, og første gongs autorisasjon er bestått. Den mellombelse tilsetjinga blir avbroten dersom eleven ikkje består dei naudsynte eksamenane eller av ein annan grunn ikkje blir rekna for kvalifisert for tenesta. Det same gjeld dersom opplæringa må avbrotast av andre saklege grunnar.

    Lønn etter utdanning

    Jamt over har ein flygeleiar god inntekt, startløn for ein flygeleiar er per 01.04.2024 på 601.000 kroner. Etter kvart vil årsløna auke avhengig av kva for eining ein jobbar på og ansiennitet.

    Tenesteplikt

    Etter fullført utdanning er det tre års tenesteplikt ved den eining som Avinor til ei kvar tid bestemmer.

    ANDRE SPØRSMÅL?

    Om du har spørsmål utover det som er svara på over, så spør oss gjerne. Er det noko du lurer på angåande flygeleitaryrket, opptaket eller studieperioden, må du gjerne ta kontakt med oss. Vi svarar på spørsmål så raskt vi kan.

    Du kan sende dine spørsmål til .

    Les meir om kvardagen som Flygeleiar